സി എന്‍ എ-
കൊച്ചി:
വിജയ് ചിത്രത്തിന്റെ ആരവങ്ങള്‍ ഉയര്‍ന്നു നില്‍ക്കെ രണ്ടാമത്തെ തമിഴ് ചിത്രവും കേരളത്തില്‍ റിലീസ് ചെയ്തു.
ചിലമ്പരശന്‍ അഭിനയിക്കുന്ന 'ഈശ്വരന്‍' ഇന്നലെ തമിഴ്‌നാട്ടില്‍ റിലീസ് ചെയ്തു. ഒരു ദിവസം വൈകി ഇന്നാണ് 'ഈശ്വരന്‍' കേരളത്തില്‍ എത്തിയത്.
ചിമ്പുവിന്റെ സിനിമകള്‍ക്ക് തമിഴ് നാട്ടിലെ ചില തീയറ്റര്‍ ഉടമകള്‍ ഏര്‍പ്പെടുത്തിയ വിലക്ക് അവസാനിപ്പിച്ചു കൊണ്ടാണ് 'ഈശ്വരന്‍' റിലീസ് ചെയ്യുന്നത്.
നടനും നിര്‍മ്മാതാവും സംവിധായകനും ചിമ്പുവിന്റെ അച്ഛനുമായ ടി. രാജേന്ദ്രനുമായുള്ള ചര്‍ച്ചയിലാണ് ചിമ്പുവിന് എതിരെയുള്ള വിലക്ക് ഒഴിവായത്. ശുചീന്ദ്രന്‍ ഗ്രാന്‍ഡ് ഫാമിലി എന്റര്‍ടെയിന്‍മെന്റ്‌സിന്റെ ബാനറില്‍ ശുചീന്ദ്രന്‍ സംവിധാനം ചെയ്യുന്ന ആക്ഷന്‍ ഡ്രാമയാണ് രണ്ടുമണിക്കൂര്‍ 10 മിനിറ്റ് ദൈര്‍ഘ്യമുള്ള ഈശ്വരന്‍. കൂടാതെ മറ്റൊരു അന്യഭാഷ ചിത്രവും കൂടി ജനുവരിയില്‍ റിലീസ് ചെയ്യും. ജനുവരി അവസാനവാരം ജാക്കിച്ചാന്റെ 'വാന്‍ഗാര്‍ഡ്' എന്ന സിനിമ പ്രദര്‍ശനത്തിനെത്തുമെന്നാണ് പറയുന്നത്.
